#عواليق_نخليها ما هي إلا صرخة متهكمة وخجولة لدعوة الشعب السوداني انو ما ينمط الناس.
زول لقيتو بهظر ما تقول انصرافي، وما تحملو فوق طاقتو.
زول استلف عبارتين رندوك ما تقول عليهو شماشي، الرندوك اسلوب تعبير .
زول استلف نَص ديني في ونسة ما تقول ليهو أبونا الشيخ ومولانا، الدين ما حكر على جماعة .
واحدة عرست حديثا ما تسألا ما بقيتو تلاته لسه، ما شرط عرست تنجب طوالي، ده إضافة إلى إنو السؤال ده جنسي بحت يا جماعة.
:?:
زول لقيتو بجك الصباح ما تشغلا ليهو وتقول عامل فيها أوروبي وما شابه، هفت ليهو في راسو وبس .
زول لقيتو بقا يتكلم في السياسة ما تقول ليهو متين عرفت السياسة عشان تنضم فيها، ما إلا يحل ليك مشكلة الاحتباس الحراري عشان يحق ليهو يتكلم، هو مواطن زيك ورأيو حقو
.
زول لقيتو بدا يلتزم بأكاديمياتو ما تقول ليهو عامل فيها قراي، عليك الله ارمي الشيت ده وخليك في البلياردو البتعرف ليه.
زول خلى قرايتو ما تقول عليهو فاشل، ياخ ما لقى نفسو فيها بس.
مهندس خاتي الخوذة بتاعتو في العربية جمب القزاز ما تقول عليهو داير يورينا إنو مهندس.
دكتورة لابسه اللابكوت في الشارع ما تقول عايزة تورينا انها دكتورة.
تلقا زول مربي دقن ما شرط يكون متدين ، اقل حاخام من اليهود فايت أجعص شيخ مسلم في الدقن، خليك من اليهود شفتو البايكرز بتاعين الهيبيز ولا حتى قبيلة الآمش في ألمانيا وامريكا دقنهم ما سائل في ضنب الحصين.
زولة لبست عباية ما تقوليها أختاه لاااا تتجزعي كدلالة لتدينها ،وقد تكون متدينة فعلا، وقد تكون عبايتها أغلى ما فيها .
زولة خلت العباية ما تقول عليها شيوعية متحررة، قد تكون أقرب ل الله منك، ده إضافة إلى إنو الشيوعية فكر اقتصادي وسياسي ما عندو علاقة باللبس والله.
زول قال " الله أكبر" ما تقول عليهو كوز ولا أخو مسلم، والله الحاجة دي ما جابوها هم.
زول لقيتو بسف ما تقول عليهو ما محترم، العادات الشخصية ما عندها دخل في التعاملات المجتمعية.
المفهوم بتاع التنميط ده الله قضى عليهو تماما في آية
"خلطو عملا صالحا واخر سيئا"
تخيل معاي، ده مدى مفتوح من قمة الصلاح إلى قمة السوء ممكن يجتمع في زول واحد، لوكان فعلا التنميط مشروع كان الله شرعو لنفسو وما جمع الصلاح والسوء في نفس الزول بدلالة كلمة خلط، يعني زول واحد خالط عملين متضادين ما بين سيئ وصالح ، ده اذا افترضنا انو البتكلم رندوك وبستلف عبارات دينية خلط عمل صالح و سيئ، والبكمل نص دينو لكن ما جاب شافع طوالي بعد العرس خلط عمل صالح وسيئ.
المفهوم بتاع التنميط ده انا اكتر زول بعاني منو حرفيا.
في السجن نمطوني ليك، ياخ حتى قبال ما أعتقل، كنت بلف الجوامع نص الناس انقسمو، القال ده كوز بلف الجوامع وما اعتقلوهو لحد هسي كيف لو ما كوز ، والكيزان قالو ده شيوعي داير يخرب علينا جوامعنا ، خشيت المعتقل بعض المساجين قالو لي مؤتمر شعبي، المحقق قال لي بتدخن قلت ليهو مرات في ونسة الشباب بشيش، قال لي طيب عامل لي فيها بتاع دين وبتلف الجوامع كيف!!
عليك الله ياتو الأسوأ، أتبنى عادة شخصية بتضرني انا ولا أتبنى عادة بتضر المجتمع زي النميمة والقطيعة .
رفضت اني أصلي بالناس بعد مرقت من المعتقل في القيادة قالو يا سلااام زول تقي، ظهرت في التلفزيون مرة وفي إذاعة مرة قالو علي بتاع بوبار، اتونس مع ناس تطلع مني كلمتين تلاته انجليزي يقولو متفلهم، يتكلم معاي زول بالإنجليزي ارد ليهو بالعربي يقول لي مالك ما بتتكلم انجليزي ولا ما عاجباك لهجتي، استشهد في حوار بمقولة او دراسة لعالم واقول قال العالم الفلاني كده كده يقولو حافظ وبسمع، اقول نفس الكلام بدون ما اقول قال العالم الفلاني كده يقولو علي متفلسف وعامل فيها مفكر، يعرفو اني حافظ قرآن يقولو يا سلاااام ياخ، يعرفو اني بسمع أغاني يقولو كيف حافظ قرآن وبسمع أغاني !
انا بسبب التصور النمطي ده بقيت بقول للقدامي دايما افرض عني أسوأ السيناريوهات، وانا متأكد الزيي كتار جدا.
السودان رغم الشمس والحر و الكتاحة والمواصلات والازمات الاقتصادية، إلا انو اكبر مستهلك للروح فيهو هو الإنسان السوداني ذات نفسو
#عولاق_نخليها ده اكتر هاشتاق قدرت أتسق معاهو روح وفكرة، ولسه ما زلت على رأيي القديم القلتو قبال سنة ونص، السودان في ال١٠ سنوات المقبلة حيكون في حاجة لأطباء نفسيين وعلماء اجتماع بنفس القدر المحتاج ليهو علماء اقتصاد وسياسة شرفاء، ومافي زول سمع كلامي ده غير أختي الصغيرة واتخصصت علم نفس بعد كلامي ليها .
البلد محتاجة ليك يا فطووووم شدي حيلك.
البوست مفتوح لإضافة العبارات المعولقة البنمط بيها الشعب السوداني الشعب السوداني ، شاركونا في التعليقات ونادو المعاطين ديل في الملأ.
#عواليق_نخليها